एकादशीच्या व्रताची । पोथी पुराणांत कथा ।
संत आळविती गाथा । व्रत पुण्यप्रद ।।१।।
देवतांच्या श्वासातून । झालें शक्तीचे निर्माण ।
रूप तेजस्वी निर्गुण । माँ एकादशीचे ।।२।।
मृदुमान्य असुराचा । केला मातेने संहार ।
देवांची तारणहार । माता एकादशी ।।३।।
एकादशीच्या व्रताने । इच्छित ती फलप्राप्ती ।
परमार्थिक प्रगती । साधती साधक ।।४।।
उपवासाचे फलित । देह चित्त शुद्ध होई ।
रोगव्याधी लया जाई । अल्पोपहाराने ।।५।।
चतुर्मासें कालखंड । शेषावर विराजित ।
श्रीविष्णू योगनिद्रेत । अखंड राहती ।।६।।
एकादशीला श्रीहरी । निद्रेतून होती जागे ।
ओढ दर्शनाची लागे । भाबड्या भक्तांना ।।७।।
एकादशी पुण्यकाली । चंद्रभागा तिरावरी ।
जमे भक्त वारकरी । विठ्ठल दर्शना ।।८।।
आषाढी नि प्रबोधिनी । एकादशी या पावन ।
घेता विठूचे दर्शन । सार्थकी जीवन ।।९।।
करिता निष्ठेने व्रत । नित पुण्याचा संचय ।
दुःखाचा पापाचा क्षय । होई या व्रताने ।।१०।।
सौ. नीता यशवंत भामरे, नासिक
