ऊन पावसाचा सोहळा
खेळण्या आला श्रावण
साऱ्यांच्या जीवनी लाभले
सुंदर आनंदाचे क्षण ||१||
थेंब टपोरे पावसाचे
नाचतो मयूर रानात
सृष्टीची किमया न्यारी
चैतन्य येई पानांफुलात ||२||
हिरवळ दाटली चहुकडे
होई सुख-समृद्धीचा वर्षाव
मनमोहक दृश्य सृष्टीचे
मन घेई निसर्गाकडे धाव ||३|
रिमझिम पाऊस धारा
स्पर्श सोनेरी थेंबांचा
श्रावण असे मनभावन
हर्ष आणि उल्हासाचा ||४||
श्रावणात पर्वणी खास
व्रतवैकल्ये नि सणांची
भाव पावित्र्यतेचे मनात
नांदी सुख समाधानाची ||५||
सृष्टी नटली हिरव्या रंगी
गीत गाण्या प्रीत स्पर्शाचे
श्रावणात सारे मिळून
जतन करूया निसर्गाचे ||६||
सौ. शितल बाविस्कर राणेराजपूत, जळगाव
